من زمان باسمع عنه
ومالوش صور كتير
نجم مشهور
عالمى و كبير
ليه اهمية ووزن
و كلمته يتقوم اعاصير
علشانه بتقوم حروب
و تنهار حكومات و اساطير
و بتتغير دول بسبب
حكمة الاخير
دايما عليه حرس ..دايما مدارى
و سرة كبير
قليل اللى بيشوفة ...واللى بيقرب له
واللى بينول الحظ دة ما بيسربش السر
الخطير
ياما قريت عنه ...و عن قلبة الكبير
المليان اسرار ... و شايل كتير
محدش عارف الحقيقة غيرة ....هو
الشاهد الاخير
لما بيتكلم ...راية بيقوم علية جدل
كبير
ياترى الراى دا الحقيقة ؟؟؟
ولا دا الفيلم المتكرر
بتاع المخرج الحقير ؟؟
و الناس دى ممثلين ولا ناس حقيقة
الحكم دا مكتوب بقلم الحق ولا بقلم
شيك
من ابو حبر بيطير ؟؟؟
الحكم دا للمواطن العادى ولا ...
لاتباع سيادة الوزير ؟؟؟
هو القاضى و الناس اللى هنا
حقيقيين ولا دى روايه عن
واحد
مجهول بيقول انه دخل
و غافل الغفير ؟؟؟
ياترى اللى فقلبة دا سر بجد
ولا زى المطار السرى الشهير ؟؟؟
من كتر ما قريت و سمعت عنه
خفت لاحسن يكون شخصية من الاساطير
هو فعلا نجم مجهول و خطير
بنسمع عنه وعن افعالة
فى الحواديت كتير
ولا ثروته ...
اصله من ذوى الدخل
الكبير
فلوسة مالهاش حصر ....محدش يعرف
التقدير
بيدفعهوها المريدين لحكمة عارفينها
بيعملوا اى حاجة وكل حاجة
و بيصرفوا الفلوس الكتير
علشان لما يظهر
يكون ظهورة فى صالحهم
تحت اسم التغيير
بيظهر فى اوقات معروفة ....
مواعيدة زى الساعة
لا دقيقة زيادة ولا يوم تاخير
كل اتباعة قدامه عبيد
خدم وباشارة منه المغضوب علية
زى الغبار يطير
اللى بيقول علية لا
فورا بيغرق فى قعر البير
ما يظهرش تانى ولا بيكون
و لا المخالفة لحكمة تصير
بيعاملوة بكل احترام
بكل حنية و تقدير
و بعد فترة طويلة من الزمان
بعد حرب ...ومعارك تحرير
و بعد شهداء وودماء واصابات كتير ...
النهاردة ...اخيرا شفته
قابلته
وقفت قدامه
و شفته قد ايه هو بسيط
قلبة مليان ...
شفاف .....و حجمة صغير
ياااااه ...كل الاسطورة دى
اللى ياما قريت و سمعت عنها
انا دلوقتى ..والنهاردة
اللى باعمل لها التغيير ؟؟
انا اللى حاكم و اقول ..
بصوتى انا
حاخليه يخرج من عزلته
و يسيب الغموض
و يبقى واضح للجميع
و مش محتاج تفسير
مش حيكون تانى شبح
حيخرج من الضلمة
حنشيل من على الباب يافطة
"" عش الدبابير
""
ونكتب بخط مشرق وكبير ....
"" صندوق الانتخابات يرحب
بكم ""
ونحط جنبها صورة كبيرة لميدان التحرير .........
ليست هناك تعليقات:
إرسال تعليق