طبعا حتسألونى
يا ترى دا اسم لفيلم ولا مسرحية ؟
مش مهم
المهم ان حكايتنا دى حقيقية
من صفحات التاريخ ... قصة واقعية
عن شلة حرامية
من اشهر التشكيلات العصابية
منهم ابن العز ...وابن العزم .... و من الشاذلية
وفيهم كمان من العادلية ...والشريفية ...و العيلة البطرسية
ومنهم اللى فاكر نفسة عبقرى من الناحية الفنية
و دى ناحية كدة ورانا ....ناسها مجاذيب ...نصابين و حلانجية
وصاحب المزاج و السرور ... و الموافقات اللا نهائية
و اللى بيسرق على نظافة ....ومنهم كبير العبيدية
دول كتيييييييييير قوى ....اكتر من المية
الله يرحمك يا على بابا
كنت حكاية ومعاك اربعين بس من الحرامية
وكانت سرقتك ايه ....جوة المغارة متخبية
سريقة صغيرة ... ارقامها مستحية
لكن شلتنا دى بقى دولة .....دولة لوحدها
وبدون حدود لا طبيعية و لا اصطناعية
شلة فاسدين .....ابليس ادالهم الاستاذية
فى كل زمان ومكان
حيوان مسعور بميت ديل و راس حية
السرقة بعد ماكانت للملكية الفردية
وسرقة مليمية
دول بقى سرقتهم مليونية ...
سرقة شعب بحالة ...سرقة مليارية
وايه ...بمسميات رسمية
مشروعات تنموية
خطط استثمارية
قوانين تنظيمية
و غيرها من اشتغالات و مسميات تفصيلية
و لاننا فى زمن ما بعد الالفية
حصلت شلتنا من الحرامية
على الترقية
فاسمهم ما بقاش الحرامية
دا بقى اسمهم مسبوق بالقاب حكومية
وزارية ...
او مستشارية ..
و غيرها من الالقاب الكبيرة المتنقية
و حتى بدون القاب ولا تسمية
لا بقوا بيخافوا ....
و لا بقوا يستخبوا زى زمان من عارهم كحرامية
و لا كبيرهم بقى ... راس الحية
زمان كان اسمه شيخ المنصر
ريس الحرامية
دلوقتى برضة ريس ....بس ببدلة رسمية
وصاحب سلطة سيادية
الله يرحمك يا عم نجيب ....
و يرحم حارتك المصرية
و يرحم ناسك....حراميتك و فتواتك المتنقية
شلتنا دى ...
كنت حتوصفها ازاى...
ياترى كنت حتسميهم ايه ؟؟
اكيد كانوا حياخدو جايزتك
بس فى السرقة الحصرية !!
المهم ...خلينا فى حكايتنا ...
الحرامية دول كانوا فى عزبة كبيرة
اطرافها مترامية
والدوار اللى كان بيشتغلوا فيه ...
واللى منه بيديروا شئون العزبة و العامية
فى وسط البلد موجود...على شكل دوارية
كانوا عاملينة فى الوسط و بالشكل دا
علشان يراقبوا البلد من كل ناحية
ويبقوا متابعين اهل البلد فى حياتهم اليومية
و فى يوم من الايام ...فى اجتماع للحرامية
قال واحد من الشلة ...ان جات له اخبارية
عن شباب البلد ...بيعملوا حاجة غريبة ومدارية
جنب الدوار ...فى الساحة الخلفية
فى اسوار طالعة ... و ليها شبابيك مبنية
قال ريسهم ... ابعتوا اللى يسال
ويشوف ايه الحكاية ديا
و بعت الحرامية بصاص للساحة الخلفية
وقابل المقاول ..... مسئول البنا و الفواعلية
سلام عليكم ...
و عليكم السلام
اتفضل شاى العصرية
شكرا يا امير ...هو انتوا بتعملوا ايه ؟؟
و ايه المبانى ديه ؟؟
دا احنا بنبنى ملعب ...على شكل دوارية
يلعب فية الشباب ...
زى مانت عارف
البلد لا فيها تعليم ولا فرص وظيفية
اهو الملعب يشغلهم ....و يملا و قتهم شوية
وعلى فكرة احنا واخدين كل الموافقات
وادى التصاريح من كل الجهات المعنية
احنا ماشيين رسمى و بالطرق القانونية
هو فى حاجة ؟؟.. لو فى حاجة نوقف البنا
ونلغى العملية
لا مافيش حاجة ... احنا بس بنطمن ...
اصل المبانى قريبة من الدوار شوية ...
ورجع البصاص بالاخبار ...
وفى الاجتماع ...فرحوا الحرامية
دى اخبار ممتازه ... كدة عال قوى ومية مية
خليهم يتلهوا فى اللعب
ويبعدوا عننا شوية
و يبطلوا يسالوا عن كل حاجة
و يراقبونا فى الرايحة و الجاية
سيبوهم يبنوا الملعب ...
دا احنا كمان لازم نعملهم افتتاح و احتفالية
ما احنا رعاة الشباب
وبنشجع الانشطة الرياضية
دا من ناحية ....
و دا كمان حينفعنا فى الانتخابات
و خطوة مهمة للتلميع و الحملة الدعائية
ودا من الناحية التانية ...
و خلص البنا ... وحددت الشلة ميعاد الاحتفالية
و فى اليوم الموعود ....
حضر شباب البلد كلهم ....
و كل الاهالى ...الناس كلها جت من كل ناحية
لحضور الافتتاح الكبير...
لاكبر ملعب فى القرية
و تقدم الريس و كبار الشلة
لقص الشريط و بدء الاحتفالية
و طلب الشباب و الجماهير الاهلية
من الريس و شلة الحرامية
انهم يدخلوا الملعب الاول
علشان الملعب يتبارك بخطوتهم ...
ودا لحصول الشرف ... وناحية تفاؤلية ..
وفعلا ..دخلت الشلة كلها للملعب
وبفخر وقفوا فى وسط الارضية ....
يتفرجوا على الانجاز ...
وهناك ...كان فى انتظارهم مفاجاء زلزالية ..
الشباب و الشعب قفلوا عليهم
بوابات الملعب الحديدية !!!!!!!!
بوابات كبيرة قوى و قوية
شربوا المقلب الحرامية ....
ما شافوش الحقيقة ...... الشلة الغبية
لانهم كانوا مشغولين بالنصب ....
على الغلابة و سرقة اقواتهم اليومية
ما اخدوش بالهم ان الشباب الواعى
بينصب لهم الخية
الاسوار كانت حوالين دوارهم مبنية
و ماكانتش حوالين الساحة الخلفية
كانوا فاكرين ان الشباب عقولهم فاضية
و الناس مهمومة بامورهم الحياتية
بس اخدوا المقلب التمام
مقلب مية مية
ولقوا نفسهم فى قفص كبير
فى وسط البلد محبوسين ...
وساعة الحساب جاية
و بقوا عبرة لكل الناس
فى كل البلاد ...فرجة
و كل عمايلهم بانت ....و فضيحتهم بقت مدوية
يسلموا شباب البلد و الناحية
تسلم العقول الذكية الصاحية
كل البلاد اللى حوالينا فخورين بينا
معجبين و بيتعلموا من العبقرية
ازاى اتعمل المقلب التاريخى
فى العقول الاجرامية
...واخدوا اعظم مقلب ...
مقلب حرامية
