العام الجديد

فى هذا العام الجديد

سأطلب ان يكون لى 
قلبا اكبر 

ليحوى حبا اكثر واكثر 
وتتوه فى مساحته كل الالام ...


وتنبت فى تربته البيضاء 
احلاما اكبر 
ويذوب فى حلاوته مر الايام ..

سأطلب قلبا اكبر

 ليمتلىء بنور الشمس 
و يطغى على حزن الامس 
و يضىء الدنيا بضحكته 

و تحتار فى وصف عذوبته   

كل الاقلام ...

اوان الورد

عارفين احنا نشبه لايه ؟؟

نشبه بذره
بتحارب صقيع 
ماسكه فى الارض
 بكل عزمها 
بتقاوم و رافضة
مع الريح تضيع 
بتحارب وتشق الارض 
و تطلع بفرعها ..
وتفتح وردة 
فى وقت الربيع 

الثورة لايمكن تضيع ..
بس لسه مجاش اوان وردها ...

باحبك

وحبك صعب ومستحيل 
فيكى حاجات بأكرها 
كره المسجون للجدران 
بس القلب عاشق حيران
مابين حبك ...وما بين حبك 
ماهو جنان بجنان 
وياما فى العشق الوان !

رسالة الى الحاكم

ايها الحاكم

لا تعبث ابدا مع الشعب

فهو المنبع و هو المصب
و بينهما نهر وجبل و درب

نهر قد ينشر الحياة
و يزرع الحب 
او يكون نهر دماء
 تطهر الارض 
جبل يخرج منه طوفان غضب 
او سيل حب 

لا تعبث مع الشعب 

فهو مصدر الحنان
 و اصل الرعب 
قد يبدوا احيانا هادئا بلا صوت 
لكنة يراقبك 
و ينتظر ليقيم عليك الحرب ...

فأنت من يكتب نهايتك 

اما ان تدخل التاريخ 
بحروف  من نور 
او ان تدخله 
كسابق او مخلوع 
مصحوبا باللعنات و السب ...

منه اتيت و له تعمل و تجد 
هو لا ينسى ابدا 
فانتبه لخطواتك و ارتقب
 لا تامنه ابدا فى السلم اوالحرب 
فقد اسال دمه عن طيب خاطر
 لينبت العشب 
وهو قانون ابدى
تستمر الحياة لانها ارادة الشعب 

فهو
لا ينسى حزن ام 
او انكسار اب
لا ينسى شجاعة شيخ 
او روح شاب 


لا تعبث مع الشعب 

عندما يغضب 
تترك الشمس منصبها 
و تضىء السماء بكل الوان الغضب 

ويترك الموت عرشة 
و يختل ميزان المستحيل و الصعب 

هو بحر من كل شىء وضده 
و بضدها تتميز الاشياء
 كما قيل فى الكتب 

بينك و بينه ميثاق شرف 
بدون كلمات ولا اوراق قد كتب 
فاحذر من الكذب 
و احذر من اللعب 
و ارقب خطواتك و استعد
ليوم يحاسبك فيه
ولا تسمع لشيطان نفسك 
ولا للعنة الكرسى تستجب 

ابتعد عن خطر
هو اسوأ من الموت 
نهايتك انت تختارها 
فلا تواجه ابدا 
من هرب منه الموت و ارتعد 
الرسالة منه واضحه
اما ان تغير او ان تتغير 

وان لم تستطع
 فارحل و ابتعد...


لا تعبث مع الشعب 

واتق شر الحليم اذا غضب ....

الاجابة

ساعات ....

بابقى عايزة اسال سؤال

بس خايفة من الاجابة

خايفة اموت من الانفعال

و تطلع فى الاخر دعابة 

كم خطيرة هى الاجابة ......

النهايه

فى احيان كتير
و بخلاف العادة

القصة مش لازم تكمل....

 مش لازم   
 كل الحكايات
يكون ليها النهايات
 الاروع و الاجمل

ساعات لما  الحكاية  تبقى بلا  النهاية

بتكون العظه اعمق 
والحكمة  انبل


كفاية انك عشت احساس
مش كل الناس
داقته

و فى ناس بتقضى عمرها كله 
 عن الشعور ده 

بتدور و تسال ....

امى

يؤلمنى ضعفها

يقتلنى عجزها

تذيبنى دموعها

لا املك من امرى شيئا و لا امرها

سوى ان ادعو ربى لها

ان يتم شفائها

و يعجل بفرحها

قبل ما اموت

خايفة اموت
قبل ما اقول كل اللى عندى

خايفة كلامى يفضل وحيد
مفيش حد يسمعه
لا يفكر فيه 
ولا ياخد فيه و يدى

مش عايزة اموت قبل ما اسيب اثر 
اى اثر
فى اى مكان
اثر صغيركده
  على قدى
اسيب ولو بصمة
 صغيرة بكفى
اثر 
لما تمر عليه 
 تقف قدامه و تهدى

تعرف منه ان هنا
كان فى يوم روح
بتحاول تكون حره
بتحاول تقول كلمة
كان عندها ولو 
فكره ...

انا مش خايفه من الموت

قد ما خايفه  انى اموت

قبل ما اقول كل اللى عندى ....

يادى الولد

قلبى واجعنى عليك يادى الولد ...


فرحة عمرى
سهرى ليالى 
وصبح جديد قلب بنكد 
لحلم عمرى اللى اتحصد


جه الموت 
وخلاك  مع غيرك عدد
و الاسم ضحيه 
ااه يابلد .....


قالك حنحاسب المسئول 
وصرف تعويض ...
ادانى فلوس 
هى سعرها كام الايام دى 
فى سوق البشر 
تسوى كام يعنى فى سوق النفوس 
 روح ابنى ؟؟



كله حيبقى تمام و عال العال 
واهو كله كلام بيتقال 
هى تتوزن باى مكيال 
ان الم باقى ابنى فى شوال ؟؟


ابنى بادور عليه بلون القميص 
و الشنطة 
و جثث العيال 
منتطورين بطول المحطة 

وانا لسه مش فاهم ايه الحكايه 
دا لسه كان فى ايدى 
كان واقف معايا 


وقفت انادى عليه
 فى الزحمة بعلو الصوت 
يجاوبنى سكوت 
و اتلفت هنا وهنا 
مش شايف غير ارض الموت 


هو ايه اللى حصل ؟؟
هو قلبى واقف ولا شغال ؟؟
اللى انا فيه دا ايه ..
حقيقه ولا خيال؟؟
انا ابنى مش زى باقى العيال 
دا روحى 
نور عينى 
اللى فى لحظة منى اتشال 

يا حادث طحنى 
زى الرحايا 
و بقيت تراب 
لما جانى الجواب 
بأسم ابنى من بين الضحايا ...

عن ...

بأكتب كلامى عن ...

عن حقى فى احلامى
عن أيام معاندانى
أمل باجرى وراه
بيظهر و يختفى
من وقت للتانى...


عن دموعى 
و قلبى الحزين ...
ابتسامه و ضحكتين 
عمرى و سنين 
هربوا من قدامى ....

عن قلبى و دقاته
ليلى و حكاياته 
اصرارى و انكساراته 
عقلى و انتصاراته 
بكرة اللى جاى 
اسراره و مكنوناته 


عنك يا زمان 
وعن الانسان 
 اللى مش انسان 
مخلوق عجيب 
مالوش قاعدة ولا بيان 

عن حاجات كتير قوى

بنستناها من عمرنا 

  ليالى  ...

وتدور بينا  الايام

 نلاقيها ...

غرقت فى بحر النسيان ...

عنى وعنك 

ياللى لسه ما قابلتك 
و عن حكايتنا
اللى ما ابتدت لسه 
ما نغير ما نقول ولا كلمة 

كل الكلام فيها اتقال 

عن روايتنا 

اللى  حكى عنها  الحكواتى
و غناها فى  الموال ....

عن قلبين متفرقين 
فى اركان الدنيا 
عن دقات  قلبين 
و رسايلهم اللى  بتوصل
 من غير مرسال 


عن صدفه او معاد 
عن القرب و البعاد

عن الرفض و العناد 

عن حلمى انى اعيش 

                    قبل ما يفوت المعاد ...

الشهداء

وتنازل الياسمين عن عرشه العالى
ليرقد على قبور الشهداء

وتناثرت بتلاته على الارض
لتتحنى بالدماء
وتوارى الكون خجلا
خلف الوجوه و الاسماء

ابتسامة طفل 
صوره شيخ 
شاب من الا طباء 
ووجوة اخرى كثيرة مجهولة الاسماء 

ياللعار ..

 ضاع حقهم 

ونحن مازلنا احياء ....

الحل فين

محبوسة فى قفص كبير
مش لاقية المفتاح
ولا عارفة الباب منين
ياترى العيب فى القفص
ولا انا اللى مش عارفة 
انى ماليش جناحين

من غير حروف

كلامى من غير حروف 

كلام واضح مالوف

حيفهمة صاحب القلب اللى سهر 

و اللى بات ليالية باكى 

و اللى صاحب الوحدة و الخوف 

نفسى قوى

نفسى البس فستان منفوش
و ارجع صغيرة من تانى
اعيش كل اللى ما عشتوش
 وامسح كل احزانى
قلبى يفضل برىء و بشوش
ولا يحس الوجع تانى 

زمن عجيب

اه يا زمن العجايب

تعبت منك الدقات و القلب دايب

احترت اعمل معاك ايه

ولا اعمل فيك ايه

بس باسامحك لما

تنولنى من الحب جانب 

سنحيا !!

قالك سنحيا 

...و اختفى

لا قال ازاى

ولا اكد ولا نفى

سابنا كدة حيارى

مستنين فى دى الحياة

ساعة تبقى حنينة

و ساعات تعاملنا بجفا

قالك سنحيا

ايه الجديد ؟؟

زية زى اللى قبله

كلام فى كلام 

وتصريحات اعلام 

حنعمل لكم ...

ولا حد عمل حاجة

ولا حد عارف احنا عايشين

 ولا اموات من غير شهادة

دى العيشة  بهدلتنا

اللى انحنى ظهرة 

و اللى على وشة اتكفى

و الفقر اخد مننا راقات

 لحد ما من فقرنا اكتفى

بقينا نحسد الاموات 

و نقول يا بختهم  

اصل  الموت رفاهيه 

دول عالم متكيفه !!

و الجديد

جاى يقولك سنحيا ...

ما احنا عايشين من زمان

لا اتغيرت شمس الصيف

ولا فى الشتا حنستغنى عن الدفا ...

اقولك انا على 

الجديد بقى ..

ان الصبر مننا خلاص 

داب و نسل 

ومابقاش نافع يترفى !!

ياليل

 

يا  اليل ...

يا ابو النجوم فى السما
 بتعاكس القمر

يا ابو نسمة حنينة
 بترقص مع الشجر

 يا مصاحب كل وحيد

و سامع شكوة 
اللى قلبة انكسر

يا مهون على  كل زعلان

و مونس اللى دمعة على خدة انحدر

 يا مغطى اللى كشفه النهار

الكل فيك بيدارى و يتستر

الكويس و الوحش

و اللى من غلبة انفجر

 يا ابو قلب حنين و قاسى 

ياهادى ومجنون 

ياللى الكل على شطك راسى 

يا كل الامان و انت مش  مضمون 

يابو الغلابة الحيرانين 
تعبهم زمن و داستهم سنين 

امانه عليك ما ترحل 
غير وانت ماسح دمعة 
كل قلب حزين 

لماذا

لماذا نفتقد شخصا
 عندما يموت ؟؟

لماذا نندم على اوقات كثيرة 
ضيعناها فى السكوت

و تبكيهم للابد ارواحنا

ونرى وجوههم 
فى ارجاء الشوارع و البيوت

و يملؤنا الحنين لايام

و ذكريات لا تموت

لماذا ؟؟

لماذا لا نحب حبا غير مشروط

لماذا نصمم على التمسك بكل الخيوط

لنجد فى النهاية اننا لا نملك شيئا 

اننا غارقين فى السقوط 

فى هوة الانا السحيقة 

واننا فى وحدة تامة 

و مستمرين فى الهبوط

تعبت

تعبت من المقاومة 
و التمسك بالحياة ...

تعبت من التماسك 
و البحث عن  طوق للنجاة ...

ايها العالم الكئيب ...

يا عم حل عنى بقى 

سيبنى ارحل 

و اشبع انت بالحياة !!! 

عايزة اعيش

مفيش اسباب

وما عنديش

كل الحكاية

انى عايزة اعيش

ازاى 
وقد ايه 
ما يهمنيش...


العمر ممكن يبقى لحظة واحدة

ما تتنسيش .....

العلام

كنت فاكرة انى متعلمة...

علشان باعرف اقرا  الورقة
و اكتب بالقلم

قامت الدنيا عرفتنى

انى خايبة فيها

وجاهلة بيها

و علشان تفوقنى

اديتنى ميت قلم ....

فى بلدى

انا فى بلدى 

مسافر زاده الخيال ....

بس معهوش تأشيرة  

ولا عنده كلام يتقال ...

لا تعليق

لم اعد اهتم 

ولم يعد مقبول 

لن اشارك فى العبث فليس لدى ما اقول 

صمتى ارقى من كلمات جاءت من احمق لا يجد ما يقول ..

عيدى ميلادى

هذا ليس يوم ميلادى 
فانا لم اولد بعد 
هذا مجرد احتفال معتاد
لبقائى  على وجه الارض 

اكره هذا الاحتفال  ..

ويقابل منى بكل الرفض
 لن ادخل فى نقاش عنه 

ولن اتكبد  حتى عناء الرد

تلك الاعياد ليست من عاداتى 
لا اعترف بالمتعارف علية
ولا اقبل باى فرض 

  فانا لافهم حقا 

كيف نحتفل بنجاح مسرحية
قبل بدء العرض ؟؟

لما

لما تفتكر شخص ما 

وتلاقيك ابتسمت بسعادة 

و مزاجك اتغير للناحية الحلوة بزيادة 

لما تحس انك بتقول له كل حاجة

 من غير ما تقول ولا  حاجة 

وتحس انك مش عايز من الدنيا اى حاجة

غير ان اللحظة دى 

تدوم العمر ..

انا

   

قلبى هرم فى ريعان الشباب

و ضقت بالحبس 

و مازلت ابحث عن الباب

ادعو ربى ان يلهمنى الصبر

 و ان اجد الجواب

لكن اشعر

 ان بقائى حية هو العقاب.....