الحياة و الموت

الموت زى الحياة  درجات 


محدش عايش قوى 
ولا حد ميت جدا 
محدش عارف مين الاحياء 
من الاموات ...

كام واحد مننا عايش 

بس من غير روح ؟؟

وكام واحد مات وهو عايش معانا 

و موجود جوانا مكان ما نروح ؟؟

الموت مش صعب 
ولا الحياه صعبة ....

بس الاصعب منهم 
انك تكون فى الاتنين 
بدون حياه ...
بره الحياه ...وبره الموت 
شبح بيتعذب فى سكوت 

دى حقائق مش مفاجات 

الموت زى الحياة درجات ...
و الفرق بينهم ...مش مجرد نبضات ...

مازلت حيا

تمردت دموعى عليا
و هاجرت من مقلتيا

واصبحت روحى الحزينة
تائهة تبحث عنى
امله ان تجدنى  يوم ما ..

مازلت حيا 

انا موجودة

فى محاولة منى
لاثبات انى موجودة

و رفض تام ومقاومه  
لفكره انى موؤودة

خرجت للعالم
بكل فخر
و قامة مفروده
قلت له
بصوت عالى 

انا هنا


صرخ فى وشى باستنكار 
 و قالى

بره 

انتى مرفوده !!

القتيل

قتيل ...

ومش معروف مين الجانى
لانه واحد مننا
وكلنا الجانى

مات ...


وهو حي فى احزانى
مين اللى قال
ان اللى يموت مره
مش ممكن يموت من تانى ؟؟


قتيل ..

والفاعل مجهول معروف
سلاح الجريمة مسدس
و طلقاته حروف 

يا قتيل قتلناه كلنا 
ووقفنا نتفرج عليه 
وكأنه من حقنا 
نقرر هو من حقه ايه 

وعجبى على اللى بيته من قزاز 
و مستغرب 

الناس بتبص ليه !

تويتر

تويتر سجن جميل

سقفه السماء
جدرانه اركان الدنيا الاربعة
قضبانة التكست بوكس...


عالم بلا حدود
قد تقابل فيه نجوم السماء
او تتعرف على ملح الارض

يتوالى الجديد فى كل لقاء
وتكتشف نفسك عند الرد

تقابل فيه شتى انواع البشر
تعرف فيه انواعا جديدة من الفكر
وتتعلم العبر

كما انك نقابل احيانا
من جاءو من كوكب اخر !!

ضحكة انس

يا ضحكة انس 

يا شمس منورة ضلمه الحال بونس 

يافراق 
معلم فى القلب بوجع ...

يا غدر 

 خطف الصبى 

كان رايح مع اصحابه ماتش كورة 

ولا رجع ...

يا قلب ام

ميت حته اتكسر 

يا اب 

دفن  حلم عمره 

و دفن معاه قلبه 

اللى

من الحسرة  احتضر  ...

ياعدل الدنيا 

يا ميزان مايل بكفة واحده 

دا القاتل اخد برائه 
و من تانى لحياته
  رجع   ...

يا ضحكة انس 

يا ضى 

سابلنا عتمة الظلم

 على الارض 

ولبراح النور 
فى السما ارتفع ...

يا حزن الوالدين 

و بشر الصابرين ...

دا ربك العدل  الكريم 

ما يضيع عنده حق 

ومسير الميزان يتعدل 

اللى على ادين ابن ادم  

مال و اتنكس ...

ماذا افعل

 لم اعرف ماذا افعل

حينما اخذت  الدنيا منى
صديقى المفضل
لم اجد شيئا سوى
 ان اجلس و اتامل...

كيف تشغل الناس 
عن بعضهم و يغرقون
كيف يتوهون  فيها بعمق و توغل
كيف يخلوا العالم من حولى
و كيف تتركنى الحياة و تمضى
وتبتعد عنى 
ومن حياتى  تتنصل ....

كم اصبحت وحيدا 
 بالرغم من الزحام و الضجيج من حولى
و يلف روحى حزن عميق
و اغرق فى بحر صمت
و فكر يتكفل
بجعلى ادرك حقيقة

انى اصلا لست موجودا 
 و لا فاعلا حتى افعل !!

الانتظار

اسؤ حاجه فى الانتظار 

انك بتبقى مش عارف 
بتبقى حاسس
بس مش شايف 
انك بتبقى خايف ....

فى الانتظار 
بتضيع اعمار 
بتتولد وتموت 
افكار 
بتتغير النوته الف مره
وتدوب من لهفتنا الاوتار ...

بتحارب 
يمكن تاخد قرار 
مرات بتبقى  متأكد
و مرات بتكون محتار...

وساعات 

من كتر الانتظار 
بتتاكل اساستنا
 و تهتز قواعدنا 
و يضيع  ثباتنا 

وبيحصل  الانهيار ....


فى الانتظار 

بتقابل حاجات جديده 
فى الاول تفتكرها مؤقته 
ومع الوقت 
تتحول الى وجود ابدى 
و أعتياد الى حد جبار ...


فى الانتظار 
بتكتشف حقائق 

و تسقط حقائق 

من قمه العالم 
الى قاع الاحتقار ...


الدموع بتكون حارقة 
و القلب مالوش اختيار 
مابين امال ....واحلام جارفه 
                   و مابين ليالى الانتظار ....

صاحبى

                    



صاحبى و اخويا

توءم روحى
سايبنى بقاله شهور
من سنتين بالتحديد

صحيح غصب عنه
و اللى حصل كان اقوى منه
بس انا من غيره تايه
 و حاسس انى ضعيف
واول مرة احس
 قد ايه انا وحيد


لسه فاكرنا سوا
اول يوم المدرسة
وقفتنا سوا فى الطابور 
 فاكر لما غنينا النشيد 
وضحكنا قوى من قلبنا 
لان كان صوتنا نشاز
بس صوت عالى وعنيد  


لسة فاكر
 لعبنا الكورة سوا
خناقات الفسحه 
 وقعدتنا ناكل فى الركن البعيد 

صاحبى دا 
 مش جارى دا ساكن بعيد
بس على طول كنا سوا
 انا لسه بانادى عليه 
حاسس انه ماشى جنبى 
والأيد فى الأيد 


فاكريا صاحبى  اول يوم العيد
 و خروجنا قبلها
علشان نشترى لبس جديد
 فاكر ضحكنا قد ايه
و لما رحنا السينما 
 تذاكرنا ضاعت  و استلفنا 
وقسمنا الغدا سوا 

هدية عيد الام 
لما جبناها سوا 
خروجاتنا مع باقى الشله
 و معسكر الوادى الجديد 

فاكر يوم ما رجلى اتكسرت 

و الوجع كان شديد

 كنت سهران جنبى 

بايت معايا

و حكاوينا خففت عنى 

ضيعت المى 

و صحيت تانى يوم انسان جديد 

صورك ماليه اوضتى 
و جنب سريرى صورتنا
سوا فوق الحصان 
 و الهرم باين ورانا من بعيد 


 صاحبى دا رقمه لسه معايا
 بيجامته لسه عندى
 صورته جوه قلبى
 صوته دايما فى ودنى 
انا بس بابكى 
لانه واحشنى  
بس عمرى ما بكيت عليه 

انا فخور انك صاحبى 

باحكى عنك للقريب و البعيد 
باحكى  قد ايه انت شجاع
 قد ايه كنت عنيد 

بقول وانا فخور

  انا صاحبى مات شهيد ....

يا حلوة

يا حلوة 

 يا أم الكعب متحنى ...

وخطاوى دايبه فى جمال العود ..

و الشعر خيلى 

بطول ليالى السهر ممدود ..

يا أم طله
غار منها بدر التمام 

وخدود
 اخد منها الياسمين حلاوة المنظر 

يا مشاغلة الشمس بضحكه 

اخدها منك الصباح 

وبيها اتعطر ...

سبحانه الخلاق العظيم 

اللى ابدع وصور 

يا ايه حسن   

وعلى الارض ماشية تتمخطر ....

دى السكة قبل ما تروحيها 

تلاقيها جايا لك 

جاية تشوف القمر 

وتلبى ندا خلخالك ....

اشجينى يا حلوة 

من شهد كلامك و اسقينى 

اسمع كلامك 

من شوق الايام يروينى ...

يا حلوة 

يا أم القوام مفرود 

نظرة رضا لله 

تحلو بيها الايام 

ومن تانى الحياه تعود ....