هو احنا لية دايما بنتخانق مع الاخر ؟؟
لية الراى ما بينا دايما تايه .... مدايق و حاير
ليه دايما خناق .... مفيش مرة واحدة
الكلام مابينا يكمل ..... و للاخر
الناس لما بنتكلم ... بيفتكرونا ...
بنتخانق ....... طالعين حرب... او حنتظاهر !!
هو ليه دايما بنتخانق مع الاخر ؟؟
لية ؟؟
ليه دايما الراى وحيد ... منزوى ومش ظاهر
مختفى مش عايز يبان ....زهق من الحرب
دايما منبوذ ..... مرفوض..... و بيعافر
دا غلبان ....وحيد ...مالوش قرايب ...
دا حتى اخوة الرأى التانى .... طفش
هرب منة و سافر
هو لية رايك دايما وحيد ؟؟
لية مالوش اخ .....ليه اخوة مالوش عندك خاطر
لية بدل ما تقول ...
اسمحلى اوضح لك ...او... انا لي راى تانى ....
تقول : انت ما بتفهمش ..... انت مدعى ... و بتتظاهر
ليه الدخلة تبقى شمال
ليه ما تبقاش حلوة و ناعمة ...
ليه بنكسر ولا بنجبر فى الخواطر ؟؟
يعنى نعرف مع بعض نضحك و نتسامر
ونجيب سيرة دا ودا .... وننم على الغايب والحاضر
ومش عارفين على كلمتين تتفقوا انت و الاخر ؟؟
لية الحوار بيبتدى و بينتهى .... بدون معنى و لا هدف
ليه بيتحول لمعركة بتلف فى دواير ؟؟
لية المختلف عنا ... بيبقى جاهل ....مش فاهم .... وكمان كافر
لية نبقى فريقين ...
يا اما معايا .... و نبقى حبايب
و لو مش معايا ...تبقى ضدى
و نرفع عليك راية العداوة ... و نحاربك باعتبارك دخيل سافر
نرفض رايك و نبعدة ... و نقولك امشى ...
...بعيد عننا روح و اتـاخر
وندخل فى صراع طويل .... مالوش اول من اخر
مين عميل ومين حبيب .....
مين جواه عدو لينا .... وهو حبيبنا فى الظاهر
دا رأى ... وكل واحد حر
ليه بيتحول لحرب الضاريات الكواسر
دا ربنا خلقنا شعوب و قبائل
تيجى انت و تلغى الاخر ؟؟
طب هو ليه مفيش احترام للاخر ؟؟؟
ليه مش عارفين انه اخر ....مش لينا تابع
و مش لازم يكون لراينا دايما مؤازر ؟؟
الاخر دا مش العدو ... ومش ابن عمك الخاين الفاجر
الراى الاخر دا اخو رايك ...بس الاسامى بتختلف
ممكن يكون اسمة الرأى .... وتكون انت الرأى الاخر
الاخر دا من دمك ....دا الناحية التانية منك
مش مختلف عنك ..... ولا بيحاربك
دا بس وياك بيتناقش و يتحاور
ليه وجهة نظر ... وراى .....
وممكن قوى فى الراى تختلفوا .....
بس لازم تفضلوا حبايب فى الاخر
ليه ما نختلفش ... ونتفق على كدة ...
ليه جهودنا تتفتت.......و رأينا يتوه و يتشعب
دا بدل ما احنا مع بعض..... نتكاتف و نتظافر ؟
طب ليه فى وقت الشدة بنبقى روح واحدة
جبارة ...... ولصوتنا دوى هادر
لية كلمتنا واحدة .... لية بتموت المظاهر
بتفضل حقيقتنا بس ... معدن نفيس ....
بينور الدنيا ... زى الشمس فى السما
ساطعة بقدرة القادر
لية بتختفى الانا و الانت ... و بيبقى فيه الواحد
اللى للوطن حامى بقدرة الجبار القاهر
لية بعد كدة بنبقى اتنين ....
ليه بيبقى بينا حجاب
و من الاسمنت ساتر
دا الموت و الحياة اتجاورو
و الفرح بيتعمل فى المقابر
واحنا مش عارفين مع بعض نتحاور ...
ولا احنا عارفين
هو احنا لية دايما بنتخانق مع الاخر ؟؟
هو فى حد فكر يسألة.....
ولا معاه عن الموضوع ده يتحاور ؟؟
جمييييييييييل
ردحذف