" مستحيل حاقبل تعازى
فى الشهيد رغم اعتزازى
الا من بعد الحساب .... "
قال النجم و غنى فى اغنيتة
سمعتها .... وغناها قلبى معاه من فرحته
اصلة بيغنيها لى ..... لو اعرف عنوانه او نمرته...
كنت كلمتة و قلت له ....
انا حاسس انى ملك .... و الناس و الجيران
و كل الشعب معازيم فى حفلتة
حاسس انى زى الجبل.... فى شموخة ووقفتة
احنا رجعنا للوطن .... النور بعد الليل الطويل و عتمتة
ما انا ابو الشهيد ....
ودى هدومة ......دا علمة ...
ودى كتبة .... ودى غرفتة
اللى سابها ... و خد علمة معاه .... و لوحتة
و خرج ...علشان يطالب بحريتة
قالى انا مش راجع .... الحرية او الموت
هى دى قضيتة
حياتى من غيرها ما تسواش
وكفاية قوى كدة .... على الفساد و شلتة
ابنى اسد... ابنى ملك ...ابنى شهيد الحق و نصرتة
ابنى راح شهيد ....و بكى القلب من فرحتة
لما شفت النصر و طلتة
لما الشعب قال كلمتة
لما اختار الحياة ... و هى كمان اختارتة
ابنى حى ماماتش ....
اسالونى انا ووالدتة
اللى ملت الدنيا زغاريد و فرح
دى ليله الفرح الكبير
ليله سقوط الظلم و كسرتة
ابنى عريس ... ودى ليلة فرحتة
ما انا باشوفة فى كل شاب ...
و كل واحد من شلتة
لما باخدهم فى حضنى ...
بشم ريحتة .... وباحس بضمتة
دا ماماتش ...لسة عايش ...
وباشوفة فى كل شاب من جامعتة
شيلت علمة من بعده .... حتى وانا فى زفتة
ما هى دى مش دفنة ... دا العريس
و دى زفتة ....
ابنى شهيد ... ابنى ماماتش ...
دموعى دى من الفرح ....بالنور و الحق و رجعتة
ابنى ماماتش ... دا حى ....
عند اللى سبحانه و برحمتة
نزل الرضا و الصبر فى قلبى ...
و ليه سجدت و سبحت له
ودعيت و قلت يا رب .... انت القاهر و القوى
انت العدل .... والميزان من غيرك يعدلة
وشيلت العلم ... و الطريق للاخر
من بعده ......مصمم انى اكملة
حاطارد الزبانية .... و الشيطان .... وحاقتلة
دم ابنى الشهيد ....طاهر .. مقدس
ما يرحش هدر ...وطول مانا حى ....ابدا مش حاخذلة
ابنى مامتش ...ابنى حى ...باشوفة ... بالمسة
فى كل بسمة طفل .... فى كل فرحة نصر
فى كل صبح حر ... وشعاع الشمس بيحضنة
ربنا عوضنى عنه بكل شاب ...الف نسر
لترابها و ارضها ...الروح بيقدموا
مش حاقبل تعازى
ايوة مش حاقبل تعازى
قلتها و قالها قلبى ..... صرخ بيها من افتخارة و عزتة
ابنى راجل ....ابنى صقر ...
وزى علمة ...عالى رفرف فى السما
كسب القضية .... واخد حريتة
ابنى شهيد ... ودا علمة .... و دى غرفتة
دى كتبة ...... ودى صورتة مع اخواته ووالدتة
ابنى ماماتش .... ابنى عايش ...
عند الرحمن الرحيم فى جنتة
مش حاقبل تعازى .....ازاى يعنى تعازى ؟؟؟
هو فى حد بيعزى حد ....فى ليلة فرحتة ؟؟
ليست هناك تعليقات:
إرسال تعليق