سمعت افراح و زغاريد من بعيد
مش هى دى ساحة المحكمة ؟؟ اه هى ... مظبوط
يبقى انا ما تهتش ....
بس ايه الفرح الكبير قوى دة ... ولمين دة ؟؟؟
مش عارف ...
بس ما استغربتش ...
اصل اليومين دول يومين فرح .... والافراح و المعازيم ...
يووووووة ... ما تقولش....
كل الناس و كل البشر ....من كل صنف و لون
اللى سمعت بيهم .... و اللى عنهم ما سمعتش
قربت علشان اعرف و اشوف ...
وقربت ...
سالت واحد من اللى واقفين ...هو ايه الزينة و الانوار دى كلها ...
....و الناس متجمعين كدة ليه فى الساحة دى و اللى بعدها ؟؟
فقاللى باستغراب : هو انت ما عرفتش ؟؟
قلت لا ... و قبل ما اكمل كلمتى ...
ما لحقتش ...
وصل الموكب الكبير ... عربيات زرقا كتيير
و حرس كتييييير ...ما تعدش
العرسان وصلوا ...وطلعت الزغاريد ولا سكتتش
و الفرحة و التكبير ....وكمان الشتايم ...
والناس فى دى بقى .... ما اتوصتش
ونزلوا من العربيات ....3 عرسان منور فى ايديهم الكلابش
لابسين ابيض فى ابيض
كل عريس منهم من قفاة اتعكش
اه....عرفتهم ... دول مشهورين قوى قوى
اعضاء فى عصابة " فنون الغرف و الكبش "
حرامية كانوا شغالين فى عزبة
كبيرها شيخ منصر ... فتح لهم سكة النصب و الهبش
و مشى مع الشيطان ... ولا رجعش
مع انه كبير السن ... واخرتة قربت
بس من الحرام اتعمى ... ومن اللى قبلة ما اتعظش
و نزل معاهم العريس اياه ...
ا ية دة ..... عارفه انا دا الوش
مش انت اللى على فلوس البلد ... كنت مكوش ؟؟؟
و من فلوسى و فلوس عيالى كبر دا الكرش ؟؟
سبحانه و تعالى ...
اللى غيرة ما بيدمش ...
كنت فاكر انك مخلد علية الكرسي
و اللزق بتاعك اصلى.... ما بيفكش !!
غبى ..... وفاكر نفسك نبيه وبتلعب بالكل ....
و انت ياعينى عليك.... للامى ما حصلتش
الامى..... اللى لا بيقرا ولا بيكتب
واللى ابعد من غيطة ... ما راحش
علشان الامى دا عارف وفاهم ....انها جات لك
لانها لغيرك ..... ما دامتش
عايش حياتك حرام ..... بالسحت و الغش
الطمع عمى عينك ....ومات قلبك من زمان ...ولا بتحسش
جمعت مال قارون .... ولسة بتجمع ..... و ما شبعتش
شارب دم الغلابة وواكلهم ......بدون ندم وما استحرمتش
انت و اصحابك .... زى القضا
خلصتوا على الاخضر و اليابس ...
شلة ابالسة ما خلتش
الله يرحمهم اهل زمان ...
قالوا ....ان اللى من ابوة و امة ما اتعلمش
تعلمة الدنيا والايام ...حتربيه .. وتكسر فى عظمة و تدش
مكنتش فاكر طبعا ان حيجى اليوم
و تتقلب عليك الدنيا..... و تلبس لك الوش
اللى بتورية للناس .... علشان تعلم اعمى البصيرة والغبى .....
و اللى ما اتعلمش
كنت مغرور ....من ظلمك ...غير نفسك ما بتشفش
وكنت متغطرس متعالى
ما تتكلمش
تشاور للناس من فوق
و تقول مين يعمل ايه .... ومين ما يعملش
شايف ان نظرة منك كفاية ... وحتى ممكن ما تشاورش
و اللى مش عاجبك ومش على هواك .....
تسيب علية كلابك .....ومن تانى ما يظهرش
سيرتك مقدسة .... واعمالك السودا بتداريها ....
وعلى مصايبك بالزور ما بتتعاقبش
نصاب و حرامى ... نرجسى و سادى ....
و الاوصاف كلها ليك ولاصحابك .... ما كملتش
اصلها من الصنف دا
قبل كدة ....ما شافتش !!!
و شرف العريس على البورش !!
الف الف مبروك ....
الف مبروك ...و عقبال الراس الكبيرة
اللى وراك باذن الله جاية ......
و عندنا حتخش
منورين والله .... ياللا يا حبيبى خش
دا القفص نور بيك و باصحابك
دا بيتك ما تتكسفش ...
دى شلة الهنا و الانس هنا ....دول شلتك
صحاب سكة اللى يروح ....
ولا يرجعش
اهل زمان قالوا .... كله سلف ودين
ودا وقت الرد للى لدينة..... لسة ما دفعش
دا وقت الحساب يا حبيبى ....عارف الفاتورة كام
ولا ما بتحسبش ؟؟؟
ولا انت مش متفوتر .... ولا ما ظبتطش ؟؟؟
اصلك دخلتها بالشمال ...
ولا بسملتش
و مليتها حرام فى حرام ... ومن نهب المليارات ما تعبتش
لا و ايه ....لسة بينكر
و بيقول ما سرقتش ...
امال كل دة ايه ؟؟ ومنين ؟؟
من الياناصيب دة .......ولا دا كلام ناس بتهوش ؟؟
ماليش دعوى و ماعرفش
مش غلطتى وعليها ما اتحاسيبش
انتى حاتستعبط ... وتعمل شاهد ماشفش ؟؟
يابنى خلص و اعترف .... قصر فى السكة دى
و ما تطولش ....
انت خلاص.. خلاص وقعت .... و فى الحالة دى
سكاكين الحق و سيوفه .... ما تتعدش
لسة الطابور طويل ....
و اللوع هنا ما ينفعش
كلة بالورقة و القلم و مفيش حاجة ما اتسجلتش
وكلة بالدليل و الشهود ...و كلة من غير الله ما بيخافش
ايام بيضة ان شاء الله ....عليك و على شلة البورش
وعلى باقى العصابة ...
انت ما عرفتش انها طارت ... و سابت لك العش ؟؟
ما هو كلة جاى هنا ...اللى اتعرف منهم ...و اللى لسة ما اتعرفش
وعقبال البدلة الزرقا والحمرا ...... و كل الالوان اللى لسة ما اتلبستش
ومسيرك للقفص الكبير ... حتخش ...
مش دة يا حلو...دا اللى هناك فى وسط الميدان ....
و التحرير دا شاهد عيان ...... و ما بيفوتش
القفص دا علشانك و علشان اصحابك ...
مخصوص مظبطينة .... وعلى الاخر متروش
ومستنيكوا عشان العبرة من غيركم ما تتاخدش
بس احنا ناس طيبة و الله ....
و قلبنا ابيض .....ما تخافش ...
فينا اللى حيرمى علكم موز وسودانى ....
واللى حيرمى لك قرش !!!
و فى حاجات كتير قوى حتترمى .. ما تعدش
و منهم اللى حيحدف بحاجة معروفة وفى حاجات تانية كتير
حتتحدف بس .... ما تتذكرش !!
دا شعبنا عبقرى .... مخترع و مبتكر.... ما بيقلدش
ماهو الجزاء من جنس العمل
كلة جاى ... و ما تستعجلش ...
ليست هناك تعليقات:
إرسال تعليق