عودة الحياة الطبيعية
مصطلح ظهر مؤخرا فى القنوات الاعلامية
و الجرائد اليومية
نريد.... ونطالب.... و نعمل على اعادة الحياة للطبيعية
واحد بينادى و يناشد بالفصحى و العامية
و دا تانى بيتكلم عن اجراءات و خطوات جدية
فى سبيل عودة الحياة الطبيعية
ياناس ..طب مش تفهمونا اولا ... ايه هيه ؟؟
ايه معنى الحياة دية ؟؟
اللى بتقولوا انها طبيعية ؟؟
وهى اصلا راحت فين ؟؟ ضاعت ولا اختفت ولا سرقوها البلطجية ؟؟
عودة ؟؟ يعنى ايه عودة .... من تانى جاية ؟؟
يا اهل الطبقة السياسية
ارحمونا من المفاهيم اللوغاريتيمة
مرة معدل التنمية ..
و مرة معجزة اقتصادية ....
و حكومة ذكية ....
حزب للاغلبية ....
مبدأ الشفافية ....
و دلوقتى حياه طبيعية ...
وغيره وغيره كتيير ..ارحموا شوية
عايزين نفهم ...هو الكلام دة باللغة العربية ؟؟؟
ومفيش فايدة كالعادة ....الكل عندة مشاكل سمعية
خلاص ... انا بنفسى حاقوم بالمهمة دية
انا يا دوب ..... جامعية
و معايا لغة ....وشوية كتب مقرية
ومعايا كمان من اصحابى شوية
منها مساهمة فى الحياة الاجتماعية
ومنها الخروج من الدايرة الهامشية
يارب يا معين .....افتحها عليا
علشان كل الغلابة ... اللى هما الاغلبية
و من فضل ربى ...الهمنا الطريقة اللى هى
اخيرا .....و بعد سنين تخرج طويلة ....
حنطبق اللى درسناه فى الكتب الجامعية
لحل هذة المشكلة الاصطلاحية
حننزل الشارع ....و نسأل عينات عشوائية
و نعمل خطة بحث اجتماعية
و نزلنا فعلا ....لتنفيذ المهمة اللارسمية
يملؤنا الامل و التفاؤل و العزيمة الحديدية
طبعا ...ما دى مهمة قومية
لفهم و ترجمة كلام الحكومة دية
اللى هرتنا قوانين و سياسات اصلاحية
مشاريع و برامج قومية
اقتراحات وكلمات متنقية
واللى بتجيب ارقام و تصريحات اعلامية
عن تقدم المعدلات التنموية الاقتصادية
و الحاجات دى كلها ....باين عليها كدة مش لينا ....دى للدولة اللى فى الناحية الغربية !
وفى الشوارع و الحارات المصرية
قابلنا الناس العادية
اللى كنا فاكرين فعلا ان حياتهم عادية .......
زيى انا وانت هو وهى
شباب وناس و بشر من كل المحافظات المصرية
ناس بسيطة .....بالوان حقيقية
فى ناس رسم الزمان على وشوشهم
خطوط عميقة و ملتوية
خطوط طويلة و صعبة
زى رحلة كفاحهم الملحمية
و اطفال صغار ....... وشباب اكبر منهم بشوية
مش عارفين الحياة بيهم رايحة واللا جاية
المستقبل منين ؟؟؟ هو فين سكتة ديه ؟
الخطوة ايه بعد الدراسة الجامعية ؟؟؟
ايه ده ؟؟ هى الاجابة على السؤال دة اجبارية ؟؟
والاف عايشين عيشة مستحية
ليها صفة الحياة و العيشة ......بس هى فى الحقيقة استعارة مكنية
عيشة على الهامش ....
و ساعات الهامش بيبقى عليهم ضيق شوية !!
ناس غلابة و الدنيا عليهم مستعفية
وناس تانية بلا كهربا و لا مية
ساكنين اماكن معروفة ... واماكن منفية
و تخيلوا بقى ان منهم اللى بيدفعوا الكهربا و المية ؟
ومنهم اللى ساكنين فى الترب ....ويومهم بيبتدى بشعائر جنائزية !
و يقولك ...عادى حاخاف منهم ليه ...دول احن من الدنيا عليا
ولو فكرنا فيها فعلا .....فالفروق اللى بينهم يعنى .... ايه هية ؟؟؟
الهوا و شوية مية ؟؟
وناس تانيين عايشين فى العشوائيات و الحوارى المنسية
وياللعجب ....من التفاصيل و القصص المسموعة منهم و المرءية
دول بشر كتيير ....ملايين منهم ....دى دنيا تانية
بيشوفوا اللى فوقهم كانهم بيشوفوا فيلم ولا تمثيلية
دول عايشين فى مدارات بعيدة كونية
بعيدا عن حياة المدن و الناس اللى هية
المدن اللى فيها اصحاب الملايين و الحسابات البنكية
او حتى الناس االى بنقول عليهم ...عادية
وناس تانيين فى الشوارع و تحت الكبارى
مالهمش سقف ولا حيطان للمدارية
ورحنا مكان تانى بعيد ....فى بحيرة شمالية
لقينا بشر تانية معزولة ..... جزيرة فى وسط المية
وتصوروا لقينا ايه ؟؟
ناس عايشين كانهم فى العصور التاريخية
بيقايضوا المحاصيل بشوية المية !!
عايشين على الرعى و الزراعة ....والحرف اليدوية
البحيرة محاوطاهم من كل ناحية
و بينهم و بين البر التانى معدية
هى وسيلة المواصلات الوحيدة من والى الجزيرة دية
و المعدية بتطلع حسب الظروف المناخية
بالاضافة الى انهم بيوقفوا استعمالها لما ييجى الليل ....
لان مفيش كهربا ....زى ما مفيش مية !
ولو عندهم مريض مستعجل او اى حالة علاجية
فى معظم الحالات ...بيموت قبل وصولة للمدنية
ولو حالة محتاجة استمرار للمتابعة الطبية
تبقى مشكلة كبير جدا .... مستعصية
لان مفيش هناك مستشفى او حتى وحدة صحية
ولا حتى سمعوا عن للرعاية الطبية
و بالنسبة للطلبة و العملية التعليمية
ما عندهمش لا كتاب ولا مدرسة ولا طلبة فى اى مرحلة تعليمية
الجميع لا يقرا ولا يكتب ..... ولا يعرفوا محو الامية
ياالله ...رحماك ....يالصدمة العصبية
معقول احنا لسة فى الاراضى المصرية ؟؟
معقول احنا مارجعناش بالزمن ولسة فيما بعد الالفية ؟؟
معقول اللى شفناه ؟؟؟ .....واللا دى هلاوس بصرية ؟؟
احنا كنا فاكرين ان حياتنا دى عادية
عارفين طبعا ان فيه فقر و فيه جهل وظلم ..و اتساع للفوارق الطبقية
اللى بيفطر كرواسون بالمربى و قهوة تركية
و االى بيقضى اليوم على رغيف و شاى القهوجية
كنا فاكرين اننا لما نبحث فى الحالة الاجتماعية
حنشوف الحياة الاعتيادية
ابتسامة بياع الفول الصبحية
طابور العيش ..... و طابور الفلافل المقلية
احترام الكبير وقعدات الصلح و المجالس العرفية
صلى على النبى ....ما تزعلش نفسك ....
دى كلها ايام و معدية
الجيران ....و الطيبة و الحارة المصرية
شباب الجامعات و الاطفال ....و الاسرة المصرية
سواقين المترو ...الاتوبيسات ....واى مواصلة عادية
واتضح لنا ان الصورة دى سطحية
من على الوش بس ....اما القلب
مأساة حقيقية
فرق كبييير قوى بين السطح والارض الحقيقية
الحياة مش بس لبس و سكن و اكل و مية
الحياة دى روح .....و الناس دى مش حية
اللى شفناه دا.... اصلا مفتقر للصفة الحياتية
دا ابشع من اللانسانية و اللاادمية
دول ناس ..ملايين ملايين من البشر ...لاهى ميتة ولا حية
الماضى و الحاضر حاجة وحدة ....الايام هى هى
وطبعا المستقبل دى كلمة غير مفهومة ....وهمية
كنا زمان بنستغرب من العمليات الانتحارية
الشخص اللى بيموت نفسة دة ....وصل ازاى للمرحلة ديا ؟؟
انه برغبتة يموت نفسة ومعاه ناس تانيين ....طواعية ؟
ناس ما يعرفهاش ولا بينهم و بينه اى اذية ؟
ناس بلا ذنب ....وجودها جنبة كان لاسباب قدرية
ازاى وصل لكدة ؟؟ كنا بنسأل منين جت الفئة ديا ؟
دلوقتى عرفت منين ....ازاى ....و الاسباب النفسية
الحكاية بسيطة ....و منطقية
احنا عدنا هرم .....للفئات العمرية
القمة بتاعته النظام .... ودا فى اعارة لدولة خارجية
مش عارفين ...لدولة بمبة بمبى .....ولا للدولة الوهمية
و القاعدة العريضة شبابية
وبين القمة و القاعدة مفيش اى وسيلة اتصالية
القمة معزولة ....فى خططها و مشروعاتها ملهية
والخطط دى طبعا ليهم مش للقاعدة الشبابية
مش سامعين و لا شايفين غير مصالحهم .....
قمة ايه ...لا دى قاع الانانية
و القاعدة دى كانت لفترة طويلة شوية
ساكنة .....هادية كدة و مش شقية
مساكين اهل القمة ....اعتبروا ان القاعدة خلاص ....منسية
هما فعلا مساكين ....
فاقدين الاهلية
لان العقل دا هبة الهية
كرم بيه الانسان على المملكة الحيوانية
بس للاسف فية ناس ....بلا بصر و لا بصيرة ولا عقلية
و القمة الغبية ...
اتخدعت فى السكون ...وافتكرت ان السنبلة دبلت ..
وخلاص وافتها المنية
بس القاعدة الفتية
مكنتش ابدا ابدا هادية
دى كانت زى ما قال الشاعر
زى السنبلة المنحنية
بس الانحناء دا مش مطاطية
لا ...ابدا
دى بس كانت من الارض مقربة
لانها بتزرع القنبلة ..... فى الارض بحنية !!!
اصل الحرب خدعة ....و دى قاعدة حربية
ماكانتش ابدا مرتخية
كانت بس متكية ....
بتصبر الصبر الجميل و مستنية
الاحساس .....الفهم ....وعودة الدموية
بس يا خسارة ....الحاجات دى كلها الهية
لا تشترى ولا تعلم ....لانها صفات انسانية
و المفتقر ليها .....بلا ادمية
ولهذا ..
لما طال الانتظار ....بلا فائدة مجدية
.قررت القاعدة الشبابية
تعليم القمة الذكية
درس النهاية ....بالقوة الجبرية
قرروا الولاد و البنات ..... وكل الفئات العمرية
كل الطبقات ......من كل الجهات ....كل الارواح المصرية
80 مليون انتحارى ....بس ايه ...صناعة وطنية
ارواح حرة ...شجاعة .... مثقفة و عالية
و الانتحار مكنش ليهم ....دا كان لاهل القمة الفراغية
القتل مكنش بييهم ....دول هما اللى اقتلعوا النظم الاستبدادية
قرروا الانتفاض ....الثورة على كل القيود الجبرية
و للميدان راحوا .....و راحت معاهم عيون البشرية
بلد الرواسي الشامخات ...اتحركت ام الدنيا
ولما تتحرك بيتحرك معاها الكون
و يميل ناحيتها فى نفس الثانية
الملوك من تانى قاموا ....و حتبقى هزة ارضية
وقفت فى وش الزمن ...السنبلة المحنية
وقالت بصوت عالى ...انا لسة مامتش ...انا لسة حية
صفارى تحت لون الشمس
لون سبايك الدهب الملالية
و عودى صلب مشدود ....و فروعى ايادى قوية
جدورى غارسة فى الارض من قبل التاريخ ..... بابدية
من اول ما الزمان ابتدى .... وانا هنا .... فى غيطان الارض المصرية
و فى الميدان ..... قلب مصر .... ارض المعركة التاريخية
صرخوا بروح واحدة ..... صرخة مدوية :
" الشعب يريد اسقاط النظام " ....الشعب يريد الحرية
" الشعب يريد اسقاط النظام " ...قالها الشعب برعدية
وبعد ايام ....اقل من العشرين بشوية
حاربوا فيها كل حاجة .....متمسكين بمطالبهم المصيرية
جت الثانية التاريخية
اللى بعد كسر منها
تحولت الساحة الحربية
الى ساحة احتفالية
وقالوا بفرحة و انتصارية :
" الشعب خلاص اسقط النظام " ........ و فرح الشعب بعفوية
" الشعب خلاص اسقط النظام " ........ الشعب اخد الحرية
اما نتيجة مهمتنا القومية
اللى وصلنالها بعد التجربة ديا
بعد ايام فريدة عمرية
التجربة التاريخية
ان عبارة " عودة الحياة الطبيعية "
دى عبارة مندسة..... عميلة.... اجنبية
عبارة مش بتاعتنا ولا لينا
عبارة صفرية
صفرها كبير .... يكتب بالالوان الفسفورية
و لازم تتحط جنب صفر المونديال
و اصفار كتير قوى .....فى كل المجالات ...
جنب بعض ...مترتبة و متساوية
فى دولاب الفضية
ذكرى وشاهد على عصر قديم ...كانت فيه خيبة النظام ....... خيبة قوية !!!
ليست هناك تعليقات:
إرسال تعليق