مش صحيح الحق مات
مش صحيح الفجر فات
مش صحيح الشمس و النجوم يقوا ذكريات
شعاع الشمس الدافى ...والامان ... و الضحكات
ابتسامة طفل فى لعبة مع الاخوات .....
الطيبة و حب الناس ...فى البيوت و الشوارع و الحارات
اللى يصح و العيب و العادات
كل دة بقى ذكريات ؟
مش صحيح
ليه ؟؟؟ ومين اللى قال انهم ذكريات ؟؟
و علشان اية يتحولوا من حقيقة لذكريات ؟؟
بيقولوا ان اسمها سياسات
عالم قاسى و ظالم ...مليان موبقات
قالوا عنها..... سياسات
ملفات ...واجندات ..و...ورقات
ملشيات واسحلة وعصابات
وناس ...بلا حياة و لا انسانيات
لابسين بدل وكرافاتات
شيك و بيلمعوا ....و لغات
بيلعبوا بالكلمات
بيلونوا العبارات
بالف لون ..والف معنى ... وبيالفوا حكايات
بيرسموا خطط و مؤامرت
بيحركوا دول و حكومات
بيحكموا حكام و وملوك و امارات
مؤتمرات ...اجتماعات ...و معاهدات
خطط ...خرائط ...مخطوطات
شعارهم ... ووطنهم ...و اللى جاى و اللى فات
المصلحة ...و المصلحة.........و المصلحة لحد الممات
كله للبيع ... كلة للبيع فى ارخص المزادات
الرخيص بالرخيص يشترى ...و الخسيس بيبيع بكل العملات
المصالح .....اسمها سياسات
و السياسات مالهاش وطن ...ولا دين ...ولا فيها انسانيات
كلهم عبيد .... ورا المصلحة بيجروا بالمسافات
اليات ...بلا ارواح ...المصلحة عندهم هى كل المعتقدات
شبكة عنكبوت ....اللى يدخلها ما يخرجش منها للممات
ما حدش يعرف مين مع مين ...ولا مين ضد مين ..
.ايه اللى جاى ...و كان ايه اللى فات ؟
هو كان عبارة عن ايه اللى فات ؟
مش عارف ....ادور فى التاريخ واللا الصفحات ؟
دا صديق ولا عدو ؟؟...صحيح بينا ذكريات
واحضان و سلامات
معاهدات و اتفاقيات
بس مش عارف ...هو انسان ...ولا من ضمن الاليات ؟؟
اللى بالف لون و الف وش ...وكمان بابتسامات
وكلة بخاصية اللف و الدوران ....و بدون ثبات
لا على مبدأ ....ولا رأى ....ولا حتى سياسات !
فى البيت اللى جنبنا ....بيقولوا واحد مات ....
مين اللى مات ؟
حد يعرف مين اللى مات ؟؟..
اللى مات دة شهيد ..لا... دول شهداء بالاف ..و مش ميات
فى مظاهرات ...او اعتصامات
غرف تعذيب او معتقلات
مواجهات مع الامن ...او الشرطة...شهداء فى الطرقات
من فقر و ظلم و قهر .....لا ادمية ولا حياة
و غيرة وغيرة ...التاريخ كاتب صفحات و سجلات
وكلة متسجل ...باليوم و التاريخ و الملابسات
علشان كدة ....
النهاردة جة وقت الحساب ....الحسنات و السيئات
يا رئيس...يا وزراء ..يا حكومات
جة وقت اللى فات
هو محدش قالكم ان اللى جاى ليكم ...مات ؟؟
اعدمناة ...واقمنا لموتة الاحتفالات
ووقفنا الزمن و التاريخ ....و جبنا اللى فات
واصدرنا حكمنا .....بلا محكمة ولا قاضى ولا مرافعات
كله مكتوب و متسجل تشهد بيه الارض و السماوات
كلة متسجل بالدليل ...كل الوقائع و الحكايات
كام مرة اشتكينا ....كام مرة عملنا اعتصامات
كام مرة خرجنا فى مظاهرات ...كام مرة وقفنا فى احتجاجات
رفعنا طلبات ...ومطالبات ...ولافتات
ولا حد صحى.... ولا سأل .......ولا حتى فكر فى الالتفات
و النتيجة ...اللى صبحنا فية ..رجعنا فية تانى نبات
الدموع ..والاهات ..و الشكاوى .....والدعوات
و دموع الامهات ..
بس خلاص ...السكوت انفجر و بقى فتات
كانوا فاكرينا عيال .....شوية شباب و شابات
زهقانين من الفراغ و الموبيلات
مزوغين من المدارس و الجامعات
وايه يعنى افراد من الشعب ...غلابة .....من العشوائيات
او حتى من اشباه الطبقات ؟؟
حيعملوا هيصة ولمة ....وفى الاخر يروحوا مواصلات ؟؟
يا ظالم ... دا احنا كنا سامعين الحوارات .....
يا عم ...سيبك منهم ...شوية كدة و كل واحد حيروح علشان يبات
هم فاكرين ايه ؟؟ هى لعبة ؟؟...لا ....دى سياسات
خطط وقرارات ....مصيرية او تابعة للاقتصاديات
و على العموم ........ ممكن نرميلهم شوية تصريحات
و فى التلفزيون و الجرائد ....نعمل اعلانات ....
من اجلك انت ..الدنيا بمبى ... وعندنا وظائف ... و فى الرخاء بنبات
بس الغافلين ...مكانوش يعرفوا اننا احياء.. مش اموات
سامعين وفاهمين ...بس الصبر كان لسة ليه عندنا شفاعات
لا وايه ...كانوا فاكرين انه نايم للابد ....مات
مات ؟؟هو فى شعب يتقال علية انه مات ؟؟
اغبياء دول ؟؟ لا لالا ....دول عندهم فى المخ ...تشوهات !!
اصل الفهم دة نعمة .. لا تشترى ولا تؤتى بالمحايلات !!
غلابة ...مش فاهمين ان على راى اللى قال
"" للصمت الفياض بالمشاعر حكم اقوى من حكم الكلمات ""
دا احنا احفاد ملوك وملكات
علمنا الدنيا ...ومن اقدم الحضارات
الشعب دة يتقال علية نايم.......... وانه مات ؟؟
للاسف مش فاهمين ...ان الصبر و الحلم ليه عندنا كرامات
بس خلاص ...صحى تانى اللى مات !!
اللى كنتم فاكرين انه مات ...واندفن ...بلا عزا ولا صوان ولا برقيات
بس حاقول ايه فيكم ...دا الوصف مش لاقى الكلمات !!
دلوقتى .........الوقت فات
وقت التظاهر و الاعتصام و الاحتجاجات
الطلبات و الشعارات و اللافتات
كله كلة...خلاص وقتة فات
متقوليش ..نتفاهم ...و لا للحوارات
مفيش اسمعنى ... انا عندى تفسيرات
حتقولى ايه ...مبررات ؟؟؟
ماكنش قصدى ..مكنتش عارف ؟؟؟ وكان عندى نيات ؟؟
كنت عايز اعمل ....وكان نفسي ....واسال الحكومات ؟؟
اوعدك ... وان غدا لات ؟
دا وقت الغضب ...الطوفان ....دا وقت اللى مات
البركان خلاص انفجر .... ومش حيموت تانى اللى مات
انت ايه ..... بقولك دا وقت اللى مات ...
مش عارف مين اللى مات ؟
ترد الارض و تقولك بقى مين اللى مات
دا ابنى ... وابويا ...و اخويا اللى بدمة لون الرمل و الحبات
دا شباب زى الورد ...زى نسمة الصباح مالى الدنيا حيوية و ضحكات
علم وشهامة و ادب ... و فيه من حلو الصفات
رجالة بتنحت فى صخر الجبال بهمة ......وتروى سمار الارض بكريستال العرق حبات
و دول بنات ....بميت راجل بس... يشبهوا الشمس فى القسمات
قوية ....خجولة ...حلوة ...منورة ......بس لو قربت لها ...تحرقك و تفحمك بلا رحمات
وياللاسف ..... مستقبلهم تاه فى غياهب القرارات
وناس تانية كتيير ..كتيير قوى ...ملايين مش الافات
حلمهم اغتالوة ....انسانيتهم و كرامتهم داست عليها الحكومات
كانوا بيعافروا ... ويحاربوا .. بيئنوا ....متمسكين بالحياة ....و انتم بلا حياء ولا مسئوليات
و نتيجة وعدك وحلمك لهم بالحريات
قتلتهم .... بالرصاص و الطلقات
شجعان ....اسود ....زلزلوا الارض و هزوا السماوات
صرخوا صرخة الحرية ....لمسوا بيها السما ... وسمعتهم المجرات
وقفوا قدام البارود ....و الجنود ...و من الامن سيارات
ملوك واحفاد ملوك ...الارض عندهم شرف ....والوطن حياة
اتحركوا ...ومعاهم اتحرك التاريخ ...والدنيا ...وسط الاعجاب و المباركات
ادوا للعالم درس ....زى العادة ...بشموخ وعزة .... و ثبات
علموهم ايه اخرة الطغاة ....وازاى تتاخد الحريات
ترد السما ..
.اللى ياما شهدت على الظلم و القهر و استقبلت روح اللى مات
ياما سمعت صريخ و دعوات ...
اهات ...وكمان سمعت حزن السكات
تعالوا يا طغاة ......مصحوبين بالدعاوى و مطرودين من الرحمات
ملعونين فى السماء و الارض....... و فى كل الديانات
ورفضت الارض ضم الرفاة
دول عمل شر....لعنهم التراب ودود الارض .... ملفوظين باللعنات
ودى اخرتكم وحكم الزمن والتاريخ ....عدم ...مالوش مكان لافى الارض و لا السماوات
ودلوقتى ..رجع من تانى وقت الفجر اللى قالوا انه فات
وحتطلع الشمس...و حنسمع للعصافير زقزقات
و يبتسم الشهيد و يبعت ضحكتة من السماوات
الحمد لله ....
رجع الحق اللى قالوا انه مات
مش صحيح
الحق عمرة ..عمرة ابدا ما مات
مش صحيح انه مات
و بعد كدة لسة بتسال ....
انت ما عرفتش ؟؟ مش قام تانى... اللى بيقولوا انه مات؟؟
ليست هناك تعليقات:
إرسال تعليق