ضرب نار

صحيت من نومى على صفارة انذار

دى صفارة التجمع

يا فتاح يا عليم .....فيه ايه تانى

دا احنا نايمين مع طلعة النهار

و قال الميكروفون :

" الوحدة كلها مطلوبة فورا  للتجمع "

واتجمعنا فى الساحة ..... فى عز  الشمس و الغبار 

و طلع علينا القائد بتاعنا

وتلا علينا الاخبار  

            " مظاهرات حاشدة فى وسط البلد

              اوامر بالتواجد المكثف و استنفار "

و اخدت عدتى   ... فى ايدى درعى وسلاحى ...

وفى رقبتى  الماسك الواقى من الغازات و  البخار

و ركبنا العربيات المصفحة ....

وفى الطريق ... دارت فى دماغى الافكار

هى الناس دى عايزة مننا ايه ؟؟؟

سرقونا  ونفضونا .... وحتى الحديدة

اخدوها مننا ليهم احتكار

بيعاقبونا لاننا لسة عايشين ؟؟

مستحملين الشقا و الغلب ...

و صابرين .... واخرتها الصبر

انضم لاخواته .... وهربوا مننا بالانتحار !!

عايزين ايه تانى ...

دى الحياة لبست علينا الاسود

و الميتين قروا لنا الفاتحة و الاذكار

بيقتلونا كل ساعة وكل يوم  ...ولما بنقول الاه

بيعذبونا.... و بيحبسونا  فى سراديب مالهاش قرار

وهناك بنختفى بلا اثر ...ولا حد يعرف عننا اى اخبار

ممكن نقعد سنين ظلم .... و المظلوم يتقتل ...

 ويموت و يندفن....  بلا اثار

عارفين ان البرىء مظلوم ... و يعذبوة ...

ويقولوله اعترف ...مش حيفيدك الانكار !!!

بيراقبونا ليه ؟؟؟ ليه كارهينا كدة

ليه دايما عننا  سودا الافكار ؟؟

كل الشعب اعدائهم .... بيحاربوهم بكل اصرار

دول مش بشر ولا من خلق الله

سبحانة الواحد القهار

يارب انت العالم .... انت العدل  ...  وانت الجبار

نفسى اخلص شدتى ... وارجع لبلدى

ازرع النص قيراط ... واخد بالى من الاشجار

واتجوز بنت عمى ...و احيا فى نظافة

بعيد عن الشيطان و الاشرار

الشعب زهق ومل

من العيشة و من الذل ... من المهانة و الاحتقار

الشعب انفجر

ومحدش يقدر يمنع البركان من الانفجار

و الله  الولاد دول اسود

شجعان ... ولاد مصر  .... زى النسوراحرار

دول الطوفان اللى حيطارد الفساد

 واللى مفيش منه فرار

دول شمس بكرة

دول كل طاهر و نقى ... دول  بكر الافكار

ووصلنا للمكان ....فى الميدان

واول ما نزلت .... وسعت عينيا من الاستنكار

ايه دة ؟؟ ...... ساحة معركة حربية  .. هو فى حد احتلنا ؟؟

هو احنا بنحارب الاستعمار ؟؟؟

كنت زى التايه .... حاسس انى فى بلد تانية

دى مش بلدى ... دى مش بلدى

كل العنف دة ....كل دا دمار ؟؟

دى مش شوارعها ابدا... و لا دا نيلها

انا اكيد نزلت غلط فى الرمادى او الانبار

حريق فى كل مكان ...

و الدخان حجب ضوء النهار

ضرب النار  و الغازات .....

ناس معاها اسلحة و مطاوى و عصى

و نازلين ضرب و قتل فى الثوار   

وسيارات الامن بتدوس الناس ...

وكمان جمال و خيول

 مطاردة  موت لكل الاشخاص و الانفار

شباب  بيجرى و يقاوم ... ويدافع عن نفسة

ضد ناس اشكالهم عارفها ...جايين من السجون و الكرار

هما هنا ليه  ؟؟؟  ولا مع مين ؟؟؟

قالولى دول بلطجية .... دول تبع الاستعمار

بيساعدوا معانا فى السيطرة و القضاء على الاحرار !!

انت مش عارف انت هنا ليه ؟؟

انت جاى هنا علشان  تساعد فى

  اعلان الحرب..... انت هنا للقضاء على الثوار

 كانت كبيرة صدمتى ....

احنا بنعمل كدة فمين ؟؟ اخويا و عمى و جارى ؟؟؟

دا النبى وصى على سابع جار

الناس دى اهلى ... امى و اختى و كبار البلد

حتى الاطفال و المثقفين   و الاخيار

ايه العنف دا كلة ...اللى على الارض دا دمنا

الناس دى مننا ...مش من الكفار

بنحاربهم كدة ليه ....امال لو كانوا العدو

كنا عملنا ايه ؟؟ نفرش الارض رمل و نسمع للحوار؟؟

يعنى ايه ؟؟ لما ابنى يصرخ  تعبان  يا ابا  

احفر له قبرة .... اوئده  ... واعتبر انه من بنات الافكار ؟؟

ونزل علينا الليل ....و الوضع فى انهيار

الشرطة اختفت ... و البلد والعة ....

وانا واقف مكانى ...مذهول ومحتار

مشلول ....مصدوم و منهار

مش دا الميدان .......مش دى بلدى

انا مش من هنا ...وماليش مكان وسطهم ....انا غريب الدار

مش معقول اللى بيحصل ..... دا جنون ....
حتنفجر دماغى من الافكار

وفجأة .....

لقيته واقف قدامى .....خطوتين منى

شاب من الشباب الثوار ... فى ايدة علم

عينيه فى عينيا ...واقف قدامى بلا خوف ولا انكسار

بصيت له قوى ... شاب زى النيل

اسمر و طويل ... روح  من الاحرار

بيحارب علشان حريتة ...بعلم و لوحة

الحرية .... الحرية   ... رافع رايتة بافتخار

وانا ايه ؟؟  حته عسكرى من عساكر الاستعمار

حسيت انى بسلاحى ضعيف ...

و غلبنى شعورى بالاحتقار

   انا زيك مصرى ...بس انا مع  لبسي ...  لبسنى العار

اصلى واقف قدام كبير ... وانا حقير من الصغار

اخدت ناحيتة خطوة .... وهوثابت فى مكانه زى الجبل باستقرار

انا مصرى ...ايوة مصرى

ودمى حر ...بيغلى فى عروقى ... انا مش عبد

انا زيك من الاحرار

انا من ارضها وواخد منها السمار

و لمعت فى عينى دمعة ... و افتكرت الشهدا الابرار

انا زيك حر ... ودمى من دمك ... وبدمى حاغسل العار  

اخدتة فى حضنى ... سامحنى يا كبير

انا قتلنى الخزى و العار

ايدى فى ايدك ... نحارب الاستعمار

و نروى بدمنا شجرة الخير و العمار

انا وانت سلاحنا دمنا ....بيه نخلى الندل و الخسيس

من قدامنا يجرى.....  و  يدور على الفرار

دمنا اللى حيروى الارض ... ويطهرها

 من مدبحة الفساد و دمة....

 اللى حيسيل على ايدينا انهار      

انا وانت و كل الشعب  ... مع بعضنا ... حنرجع حقنا

حنرجع الشمس من تانى ...... و يعود لبلادى ضوء النهار