من مدة كبيرة
و لفترة طويلة من الزمان
كانت الحياة ماشيه بانهزام
روتين و ملل... اهى عيشة و السلام
ايام شبه بعضها ...اللى بيحصل واحد فى كل الايام
كله بيجرى على لقمة عيشه ... واخداه دنيته
كله ساكت عن الكلام
و اتكلم ليه ؟؟ اية الفرق ؟؟
اللى احنا عايزينه ....محدش حيسمعه ولا يعمله
واللى هما عايزينة هو اللى حيتعمل
دى عملية ماشية و مترتبة ...
لعبة ... و من زمان بيلعبها النظام
" حافضل فيها لاخر نبضة فى عروقى
دا انا والله من حبكم ما بانام "
وناس تسقف .... وناس تهلل ...
وناس تحلف بحياة النظام
دى الحياة فى عهدك بمبى ....
واحنا فى رخا و سعادة ....و كلة تمام
مفيش مشاكل ....دى كلها حاجات عادية .....
ما تشغلش بالك يا ريس......
دى الفلوس كتير ..... و الشعب نايم على ريش نعام
مسرحية بايخة و سخيفة
تمثيلية معادة من اغبياء....فاكرين اننا بلا عقل
الاغبياء ... فاكرين انهم بيعرضوها
على ناس مهلوسة وجماهير نيام !!
و بعدين قامت الثورة
وقامت الجماهير .... وقامت معاها قيامة النظام
قام الشعب اللى قالوا انه من بدرى نام
كلة صحى ....و ما بقاش فى حد بينام
قعدوا فى الميدان ... واتحدوا كل حاجة....
واجهوا الموت و الزمن ....لايام و ايام
على كلمة واحدة ....روح واحدة
ملاين الملايين .....بلا اختلاف ولا انقسام
على الصوت الرعدى
كان الكل بيصحى و ينام
" الشعب يريد اسقاط النظام "
ظهر المارد القوى ...
وسحق النظام
اجبره على التنحى ......
و كسر النظام
ووقع المبنى وسقط ... و بقى حطام
ورحل النظام
اللى كان فاكر انه مخلد فيها ...لاخر الايام
و اتقلبت الدنيا كلها
وجانا الفرح الكبير قوى ...
بس ايه
يومين او ثلاثة بالتمام
و رجعنا دخلنا فى خلاف و انقسام
ناس تقول ...
مش عايزين الحكومة دى .....
دى حكومة عينها النظام
و ناس تانية تعترض ...
لأ احنا عاوزينها ... ورئيسها دا
راجل ميه ميه وتمام
واتغيرت الحكومة
برضة الشعب مش عاجبه
لسة الوزارات دى من بقايا النظام
ورئيسها دة بيلف و يدور فى الكلام
وناس تانية تقول ...
اهدوا عليهم شوية ....
ادولهم فرصة ...دا ربنا خلق الدنيا فى 6 ايام
الله بقى ما تفهمونا ..... هو ايه دا الكلام
ناس تقول نعدل الدستور مؤقتا
الجديد دا عايز له وقت ودراسة ...
و ناس تانية تقول ....لا
التعديل مرفوض ....دا مجرد تبديل و لعب بالكلام
و بعدين معاكم بقى ....حيرتونا
الوضع كدة مش تمام
و كل شوية ناس معتصمين ..... ومعترضين
يروحوا الميدان ..... و يقعدوا .... ويرفعوا اليفط
ومن هنا مش ماشيين .....
احنا مش عاجبنا اللى حصل ..... دا لازم يتغير
ولحد ما يحصل احنا هنا بايتين !!
كدا بقى احنا داخلين على حقل الغام
و بيقولوا الجيش حبيب الشعب ...تمام
وفى خدمة الشعب كل ظابط همام
مافيش خلاف ...حلو قوى دا الكلام
و بعدين ......نلاقى الجيش بيمسك فى الشعب
والشرطة والشعب بيتعاركوا بالمسدس والحزام !!!!
والشرطة والشعب بيتعاركوا بالمسدس والحزام !!!!
يا اخوانا ارحمونا بقى .....عايزين راى واحد
و اتفقوا بقى على كلام
ايه اللخبطة دى ......و فين النظام ؟؟
دا دلوقتى ...
اى حوار بيبتدى بكلمة .... و ينتهى بخناق و اصطدام
احنا عملنا الثورة علشان ترجع الكرامة و الاحترام
وللانسان تعود ادميته و يرحل الامتهان
اخرة الاختلاف دا ايه ؟؟
اخرة الاختلاف دا ايه ؟؟
ارسوا لكم على بر يا سادة يا كرام
احنا مش عارفين اول السكة من اخرها
محدش فينا فاهم ايه الحكاية
انتم ليه واقفين لبعض كدة....هواللى بتعملوه دا الحوار
ولا دا خناق وانتقام ؟؟
انا وجيرانى من الناس العادية ...
مالناش فى السياسة ....ولا اللوع فى الكلام
احنا لما نزلنا الميدان ... كنا عارفين عاوزين ايه
وعاوزينة ازاى ...و على الهدف ده
من كل الملايين ... كان فى تصميم والتزام
دلوقتى ...احنا مش فاهمين ايه اللى بيحصل ده ....
شايفين ناس كتير قوى بيتكلموا
و اتجاهات اكتر ....وكله ضد كله
الحوار بينهم بقى بعدائية و احتدام
و كل دول بيفتوا ....واحنا مش فاهمين
احنا ناس على قدنا .... قليل نصيبنا من العلام
ما تفهمونا ايه الحكاية .... دا حتى كده حرام
حواراتكم كلها فوضى ....ولا فيها ادنى انتظام
الكلمة دى باينها كدة ..... عيب و مش تمام !!!
الكل بيتكلم عليها .... ويجيب سيرتها ...
بس مافيش بينهم انسجام
طب نغيرها يمكن نفهم ...ماشى
طب قولى يا بيه ....
الا.... هو على ايه الكلام ؟؟؟
واللاالصحافة و اللى بتكتبه الاقلام ...
و الاتهامات دى كمان .... كلة لكله بيتهم
عميل .... مندس ..... حرامى ....و ديل للنظام
والاتهامات بقت كتير قوى وعلى الكل متوزعة
حتى على المكوجى و بتاع اللحام !!
ولا دى شائعات .... مين الصح ومين الغلط
نروح لمين و نسمع مين
عقولنا تعبت ... والله حرام
تاهت الحقيقة مننا وسط الزحام
دا الصراع بقى ولا اللى فى اكبر فيلم من الافلام
يا اخوانا ...بالبلدى كده ....
احنا بنرجع ورا مش بنطلع لقدام
تهنا .... واحنا كدة تايهين
ازاى نبنى و ننفذ الاحلام ؟
عايزين نبقى من الامم الكبيرة العظام
ومش حنعمل دة الا لما نرسى على بر
و نبتدى الشغل .... ونبطل كتر كلام
بس الخريطة ضاعت مننا
هو اللى بيحصل دة حقيقة .... ولا اوهام ؟
هو احنا لية وقت الشدة كنا واحد
ودابت و اختفت كل الفواصل ... و سكت الكلام
كتفنا فى كتف بعض ... بنيان مرصوص باحتكام
شخص واحد بكلمة واحدة
" الشعب يريد اسقاط النظام "
كلمة هزت الدنيا
ايه اللى حصل دلوقتى.... راح فين بينا السلام ؟؟
احنا عملنا اللى ما اتعملش من سالف الزمان
والدنيا كلها اعجبت بينا .... و بالترتيب و النظام
و شكر فينا ابن العم سام
وقال لازم ولاده مننا يتعلموا
ازاى الشعب كان كله قائد واحد ....
ازاى يكون التوحد و الالتحام
وباقى الدنيا ضربت لنا تعظيم سلام
وباقى الدنيا ضربت لنا تعظيم سلام
وفى كل مكان ....كل الناس للشهيد بتاعنا
وقفت دقيقة احترام
وخاف و اترعب مننا السيس الجبان
لما شافنا مع الموت .... حبايب ....
و بالحضن بناخدة و بالابتسام
بعد اللى عملنا ده كله ....
مش عارفين نعمل حوار بينا
و نرتب فية الكلام ؟؟
مش عارفين نسمع بعض
و نتفق على سكة ... و نختلف باحترام ؟؟
مش كدة برضة الصح ..... ولا ايه رايكم فى الكلام ؟؟
هاتوا بقى من الاخر ....عايزين سكة واضحة
كفاية بقى خناق .... تهنا فى الزحام
عايزين حد كدة بهداوة .... و بالبلدى ... يشرح لنا و يفهمنا
هو ايه النظام .... و على ايه الكلام ....
لازم نتغير ....و طريقتنا تتغير
لازم نتغير ....و طريقتنا تتغير
العهد الجديد ده .... لازم يبقى جديد بجد.... مش اى كلام
ليست هناك تعليقات:
إرسال تعليق